ဖေဖော်ဝါရီ ၁၈၊ ၂၀၂၅
Shy V ( VOM)
တရုတ်ရဲ့ ကြားဝင်စေ့စပ်မှုနဲ့ လက်ရှိစစ်ရေးပြဿနာတွေပြေလည်နိုင်ဖို့ နစက တပ်ဖွဲ့နဲ့ TNLA တို့အကြား တရုတ်ဘက် ကူမင်းမှာ ဆွေးနွေးပွဲ ပြုလုပ်နေတာ ဖြစ်ပြီး ဆွေးနွေးပွဲမှာ TNLA တပ်ဖွဲ့က နယ်မြေ တောင်းဆို တင်ပြလာကြောင်း သတင်း ထွက်ပေါ်နေပါတယ်။
ကူမင်း ဆွေးနွေးပွဲမှာတော့ TNLA တပ်ဖွဲ့က သိမ်းပိုက်ထိန်းချုပ်ထားတဲ့ နမ့်ဆန်၊ မန်တုံ၊ နမ့်ခမ်း၊ ကွတ်ခိုင်၊ နမ္မတူ၊ မိုးမိတ်၊ မိုးကုတ်၊ သီပေါ၊ ကျောက်မဲ၊ နောင်ချို၊ မိုင်းလုံ၊ မိုင်းငေါ့ စတဲ့ ၁၂ မြို့၊ KIA နဲ့ ပူးပေါင်း တပ်ဖွဲ့ ထိန်းချုပ်ထားတဲ့ မဘိမ်းမြို့၊ နစက အစိုးက ထိန်းချုပ်နေတဲ့ မိုင်းရယ်၊ တန်.ယန်း၊ မူဆယ် စတဲ့ မြို့ ၄ မြို့ ကို ပလောင်ပြည်နယ်အဖြစ်အသိအမှတ်ပြုပေးဖို့ နစက အစိုးရထံအဆိုပြု ဆွေးနွေးတင်ပြကြောင်း သတင်းရင်းမြစ်တွေကို ကိုးကားပြီး လူမှုကွန်ယက်မှာ ပျံ့နှံ့ နေတာ တွေ့ရပါတယ်။
နစက တပ်ဖွဲ့ နဲ့ TNLA တပ်ဖွဲ့ တို့အကြား အပြန်အလှန် အနေနဲ့ တိုက်ပွဲအတွင်းက နစက တပ်ဖွဲ့ရဲ့ စစ်သုံ့ပန်း တွေကို ခြွင်းချက်မရှိ ပြန်လည် လွှတ်ပေးမယ်လို့ TNLA တပ်ဖွဲ့ဘက်က ကမ်းလှမ်းထားကြောင်းလည်း သိရပါတယ်။
ဒါ့အပြင် ပြည်ထောင်စု မြန်မာနိုင်ငံတော်ရဲ့ အချုပ်အခြာ အာဏာ ပိုင်နက်ထဲမှာ ထာဝရတည်ရှိနေတာေကြာင့် ဘယ်တော့မှ ခွဲထွက်မှာမဟုတ်ကြောင်း အာမခံ ဆွေးနွေးကာငြိမ်းချမ်းရေးကို နိုင်ငံတော်အစိုးရနဲ့ လက်တွဲ ပူးပေါင်း ထိန်းသိမ်းသွားမှာဖြစ်ကြောင်း ဂတိပြုထားတယ်လို့ ဆိုပါတယ်။
TNLA တပ်ဖွဲ့ တင်ပြ တောင်းဆို ဆွေးနွေးအဆိုပြုချက် အားလုံးကို နစက အစိုးရက ဘာတခုမှ လိုက်လျောပေးဖို့မတုံ့ပြန်သလို ၂၀၀၈ အခြေခံ ဥပဒေ ပြဌာန်းချက်အတိုင်း ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နဲ့ မန်တုံမြို့ မြို့နယ်နှစ်ခုသာရှိ မြဲရှိေနမှာ ဖြစ်ပြီး လက်နက်ကိုင်လမ်းစဥ် အပြီးအပိုင်စွန့်လွှတ်ခြင်းမှ တပါးတခြား တောင်းဆိုခွင့်မရှိကြောင်း၊ ပလောင်ပြည်နယ် တောင်းဆိုလိုပါက အနာဂတ်ပေါ်ပေါက်လာမယ့် အရပ်သားအစိုးရပြည်ထောင်စု လွှတ်တော်ထံတင်ပြ အဆိုပြုနိုင်ကြောင်း ဆွေးနွေးတယ်လို့ ဆိုပါတယ်။
နစက နဲ့ နီးစပ်သူကတော့ ကူမင်းဆွေးနွေးပွဲမှာ ပလောင်ပြည်နယ် တောင်းဆိုေပမယ့် နစက ဘက်က ၂၀၀၈ ဖွဲ့စည်းပုံအတိုင်းပဲဆက်သွားမှာဖြစ်ေကြာင်း၊ အစိုးရအသစ်တက်လာချိန် တရားဝင်လွှတ်တော်မှာတောင်းဆိုဖို့ ဆွေးနွေးကြောင်း သိရတယ်လို့ ပြောပါတယ်။
နှစ်ဖက် ဆွေးနွေးမှု အဆင်ပြေတာ မကြားရပေမယ့် ကြားဝင် စေ့စပ်ပေးတဲ့ တရုတ်ဘက်က ဘာတွေ ထုတ်ပြန်လာမလဲ ဆိုတာတော့ မပြောနိုင်ဘူးလို့ ဒေသခံ တချို့က ပြောပါတယ်။
တရုတ်နိုင်ငံရဲ့ ကြားဝင်စီစဉ်မှုနဲ့ လက်ရှိစစ်ရေးပြဿနာတွေပြေလည်နိုင်ဖို့ ကူမင်းမှာ ဆွေးနွေးပွဲ လုပ်နေချိန်မှာပဲ ယမန်နေ့ ဖေဖော်ဝါရီလ ၁၇ ရက်နေ့ ည ၈ နာရီခွဲ ဝန်းကျင်ခန့်က TNLA တပ်ဖွဲ့ ထိန်းချုပ်ရာ နမ္မတူမြို့နယ်ရှိ ဒေသအခေါ် ဆိုင်းခေါင်ဝ် တောင်ဘက် နစက ဘက်က လေကြောင်း ဗုံးကြဲ တိုက်ခိုက်ခဲ့သလို နစက ကိုယ်စားလှယ်တွေနဲ့ TNLA ကိုယ်စားလှယ်တွေ ဆွေးနွေးပွဲ အတွက် ကူမင်းမြို့ကို စတင် ရောက်ရှိတဲ့ ဖေဖော်ဝါရီလ ၁၅ ရက်နေ့ကမှာလည်း TNLA တပ်ဖွဲ့ ထိန်းချုပိထားတဲ့ နောင်ချိုမြို့နယ်ရှိ ရွာတချို့ကို လက်နက်ကြီး အပြင် လေကြောင်းနဲ့ ပစ်ခတ် တိုက်ခိုက်ခဲ့တာ ရှိကြောင်း TNLA ဘက်က သတင်း ထုတ်ပြန်ချက်အရ သိရပါတယ်။
ပြီးခဲ့တဲ့ ဇန်နဝါရီလ ၂၀ ရက်နေ့ နေ့စွဲနဲ့ တရုတ်အစိုးရရဲ့ ကြားဝင့် စေ့စပ် ဆွေးနွေးမှုအရ နစက တပ်ဖွဲ့နဲ့ MNDAA တပ်ဖွဲ့တို့ အကြား တရားဝင် ယာယီ အပစ်အခတ် ရပ်စဲလိုက်ကြောင်း တရုတ် အာဏာပိုင်တွေဘက်မှ ထုတ်ဖော် ပြောဆိုလိုက်တာ ရှိပေမယ့် နစက တပ်ဖွဲ့နဲ့ MNDAA တပ်ဖွဲ့ တို့က တရားဝင် အသိပေး ထုတ်ပြန် ထားတာမျိုးတော့ မတွေ့ရပါဘူး။
Photo:CJ
